大刀王五

民間流傳，大刀王五係晚清十大高手之一，同霍元甲、李三、黃飛鴻等武師齊名。大刀王五本名王正誼，又叫王子斌，細細個同媽媽相依為命。佢拜雙刀李鳳崗為師，擅長用刀，因為排行第五，所以又有大刀王五之稱。王五越練越勁，師傅就向自己嘅師兄劉仕龍推薦王五去押鏢，等佢於江湖歷練。光緒年間，王五响北京開咗間源順鏢局，生意都幾好，名滿京師。

王五當時同維新派嘅譚嗣同好老友，仲教過對方用刀劍。戊戌政變期間，大刀王五曾經同譚嗣同密謀劫返光緒出嚟，不過最後都係唔成事。之後王五勸譚嗣同走人，譚嗣同拒絕咗佢之後，送咗把佩刀過王五，就被捕入獄。連同譚嗣同在內，戊戌六君子最終於菜市口被斬首。王五據講好有義氣，幫譚嗣同收屍。

去到公元1900年，義和團崛起，王五帶人參加，走去殺洋人，毀教堂。同年十月，王五被清兵捉拿，交予八國聯軍，最後被德軍於前門外槍殺，仲將佢嘅頭顱掛於城門之上。據講，當時身在天津嘅霍元甲趕到北京，拎返王五嘅首級，並好好埋葬。